ہاؤسنگ، مالک مکان اور جائیداد

کرایہ کا معاہدہ ایک قانونی معاہدہ ہے جس میں مالک مکان متفقہ رقم کی ادائیگی کے عوض کرایہ دار کو پراپرٹی استعمال کرنے کا حق دینے کا عہد کرتا ہے۔

کرایہ کے معاہدوں کے لیے فارم کی کوئی ضرورت نہیں ہوتی۔ کرائے کا معاہدہ زبانی یا تحریری طور پر کیا جاسکتا ہے اور اسے کسی بھی فریق کے خلاف استعمال نہیں کیا جاسکتا۔ تاہم تحریری معاہدہ کسی تنازعہ کی صورت میں بطور ثبوت استعمال کیا جا سکتا ہے لہذا آپ کے لیے تحریری طور پر معاہدہ کرنا زیادہ فائدہ مند ہوگا۔

کرایہ کے معاہدوں میں اکثر دو حصے ہوتے ہیں: عام اور ذاتی شرائط و ضوابط۔ یہ دونوں حصے تب تک درست اور موثر رہتے ہیں جب تک وہ متعلقہ قانون کی لازمی دفعات کی پر عمل پیرا رہتے ہیں۔

اس کے علاوہ یہ ضروری ہے کہ کرایہ کے معاہدے میں فریقین کی شناخت کی تفصیلات، پراپرٹی کا پتہ، معاہدے کے آغاز کی تاریخ اور مدت، متفقہ کرایہ کی رقم، ادائیگی کا طریقہ، پراپرٹی کے استعمال کا مقصد اور اس کی حالت، فکسچر (اگر کوئی ہو)، اور سیکیورٹی ڈپازٹ کی رقم شامل ہو۔ کسی بھی تنازعہ کی صورت میں یہ کارآمد ثابت ہوگا۔

کرایہ کے معاہدے کو نوٹرائز کرنے کی کوئی ضرورت نہیں ہے۔ تاہم معاہدے کی قدر کو مضبوط بنانے اور تنازعہ کی صورت میں ممکنہ نقصان سے بچنے کی خواہش رکھنے والی جماعتیں نوٹرائزیشن کا انتخاب کر سکتی ہیں۔ براہ کرم یہ بھی جان لیں کہ اگر آپ رینٹل کنٹریکٹ نوٹرائز کراتے ہیں آپ کو اسٹامپ ٹیکس ادا کرنے کی ضرورت ہوگی، جس کا حساب کل کرایہ کی مجموعی قیمت پر کیا جائے گا۔

رئیل اسٹیٹ ایجنٹ ایک لائسنس یافتہ پیشہ ور ہے جو کرایہ یا جائیداد کی فروخت کے لین دین میں سہولت فراہم کرنے کے لیے کام کرتا ہے۔ کرایہ کے معاہدے کے تناظر میں رئیل اسٹیٹ ایجنٹ مالک مکان اور کرایہ دار کے درمیان ثالث کے طور پر کام کرتا ہے۔

اگر کرایہ دار کرایہ کے معاہدے کے لیے رئیل اسٹیٹ ایجنٹ کی سروس حاصل کرتا ہے تو ایجنٹ کمیشن یا فیس وصول کرنے کا حقدار ہوگا، جو کہ کرایہ کی ایک ماہ کی منظور شدہ رقم سے زیادہ نہیں ہوسکتی۔ یاد رکھیں کہ یہ ادائیگی صرف ایک بار ہو سکتی ہے۔

موجودہ قانون کے تحت اگر کرایہ 500 لیرا یا اس سے زیادہ ہے تو آپ کو اسے بینک ٹرانسفر کے ذریعے ادا کرنا ہوگا۔ رقم ٹرانسفر کرنے کے بعد اپ کو بینک اسٹیٹمنٹ جاری کرے گا۔ اس کو اپنے پاس محفوظ رکھنا مستقبل میں کسی تنازعہ کی صورت میں کام آسکتا ہے۔

اگر ماہانہ کرایہ 500 لیرا سے کم ہے تو اس کی ادائیگی کی دستخط شدہ رسید حاصل کریں۔

اگر آپ نے کرایہ کے معاہدے میں ادائیگی کی تاریخ مقرر نہیں کی ہے تو عام طور پر اسے مہینے کے پہلے تین دنوں کے اندر اندا ادا کردیا جانا چاہیے۔

کرایہ کے معاہدے کے اختتام پر توسیع کرتے وقت کرایہ بڑھایا جاسکتا ہے۔ تاہم یہ اضافہ پچھلے کرائے نامے کی مدت کے حساب سے ترک کسٹمر پرائس انڈکس سے ذیادہ نہیں ہونا چاہیئے۔

سیکیورٹی ڈپازٹ مالک مکان کے لیے اس کی جائیداد یا گھر کی تنصیبات کو پہنچنے والے نقصانات کو پورا کرنے کے لیے یا کرایہ نہ ملنے کی صورت میں ضمانت کے طور پر لیا جاتا ہے۔ اگر آپ کے کرایے کے معاہدے میں سیکیورٹی ڈپازٹ کی فراہمی شامل ہے تو یہ قانونی طور پر تین ماہ کے کرایے سے ذیادہ نہیں ہو سکتا۔

معاہدہ ختم ہونے کے بعد یا اگر آپ پراپرٹی چھوڑ دیتے ہیں، تو آپ سیکیورٹی ڈپازٹ کی واپسی کے حقدار ہیں بشرطیکہ جائیداد کو کوئی نقصان نہ پہنچا ہو اور کوئی غیر ادا شدہ کرایہ نہ ہو۔

اپارٹمنٹ یا مکان کرایہ پر لیتے وقت آپ کو ذہن میں بہت سے باتیں رکھنی ہیں۔ سب سے پہلے اس بات کو یقینی بنائیں کہ جس شخص کے ساتھ آپ معاہدہ کر رہے ہیں وہ کرایہ دار یا اس کا مجاز ایجنٹ ہے۔ اس مقصد کے لیے آپ پراپرٹی دستاویزات دیکھنے کی درخواست کر سکتے ہیں۔ آپ کو یہ بھی یقینی بنانا چاہیے کہ معاہدے میں درج پتہ اسی جگہ کا پتہ ہے جسے آپ کرایہ پر لینا چاہتے ہیں۔

اس کے علاوہ، آپ کو یہ یقینی بنانا چاہیے کہ معاہدے کی دفعات درست ہیں۔ ان میں کرایہ کی رقم، اضافے کی شرح، ادائیگی کی تاریخ اور طریقہ، سیکیورٹی ڈپازٹ کی رقم، سیکیورٹی ڈپازٹ کی ادائیگی کے لیے کوئی خاص شرط، کرایہ پر لینے کے وقت پراپرٹی کی حالت اور فکسچر کی فہرست شامل ہیں۔ آخر میں، کرایہ کے معاہدے کے تمام صفحات پر عمل درآمد اور قابل عمل ہونے کے لیے دونوں فریقوں کے دستخط ہونے چاہئیں۔

ایک بار جب آپ معاہدہ کرلیں تو آپ کو یوٹیلیٹیز اپنے نام پر منتقل کرنے کی ضرورت ہوتی ہے۔ براہ کرم یہ بھی جان لیں کہ آپ کو 20 دنوں کے اندر پاپولیشن اینڈ سول رجسٹری ڈیپارٹمنٹ کو اپنے ایڈریس میں تبدیلی کی اطلاع دینی ہوگی۔ اطلاع کے طریقہ کار کو مکمل کرنے کے لیے آپ کو ایک درست شناختی دستاویز اور اپنے کرایے کے معاہدے کی ایک کاپی پیش کرنی ہوگی۔ آپ کو صوبائی ڈائریکٹوریٹ آف مائیگریشن مینجمنٹ کو بھی اطلاع دینی چاہیے۔

نمرتاج ایک ایسا دستاویز ہے جو میونسپل ادارہ اپنے حدود میں ہر عمارت کے لیے جاری کرتا ہے۔ اس میں رہائش کے لیے مخصوص ایڈریس اور ٹائٹل ڈیڈ کی معلومات شامل ہوتی ہیں اور یہ عمارت کو قومی ایڈریس ڈیٹا بیس میں شناخت کرنے کے قابل بناتا ہے۔ اگر آپ کے لیز پر دستخط کرنے کے بعد پاپولیشن اینڈ سول رجسٹری ڈیپارٹمنٹ کے حکام آپ سے یہ دستاویز فراہم کرنے کو کہتے ہیں تو اس کا مطلب یہ ہو سکتا ہے کہ عمارت مذکورہ نیشنل ڈیٹا بیس میں رجسٹرڈ نہیں ہے۔ اس صورت میں آپ کو میونسپلٹی کے متعلقہ محکمے میں درخواست دینے کی ضرورت ہے یا آپ اپنے مالک مکان سے اسے کرنے کو کہ سکتے ہیں۔ وہ افراد جو ایسی رہائش گاہوں میں رہتے ہیں جو قومی ڈیٹا بیس میں رجسٹرڈ نہیں ہیں انہیں بجلی، پانی، ہیٹنگ اور انٹرنیٹ جیسی بنیادی خدمات تک رسائی میں دشواری ہو سکتی ہے۔

آپ کا مالک مکان جائیداد کے معمول کے استعمال سے ہٹ کر ہونے والی مرمت کے اخراجات کے لیے ذمہ دار ہو گا (جیسے بوسیدہ فکسچر کی تبدیلی)۔ تاہم روزمرہ استعمال کے نتیجے میں ہونے والی مرمت کی ادائیگی آپ پر واجب ہوگی۔

عمارت کی مرمت بشمول چھت یا بوائلر روم کی مرمت یا عمارت کی پینٹنگ کے لیے اٹھنے والے اخراجات مالک مکان کی ذمہ دارہ ہے کہ ادا کرے۔ تاہم آپ عام اخراجات کے لیے ذمہ دار ہوں گے جیسے کہ چوکیدار کی خدمات کی فیس، صفائی ستھرائی، اور دیگر عام اخراجات بشمول پانی اور بجلی کے اخراجات۔

آپ کی اہم ذمہ داریاں مقررہ وقت پر کرایہ ادا کرنا، کرائے کی جائیداد کو احتیاط کے ساتھ استعمال کرنا، اور صفائی اور بنیادی دیکھ بھال کے لیے ادائیگی کرنا ہے۔ آپ کو مالک مکان کی واضح اجازت کے بغیر جائیداد میں اہم تبدیلیوں یا تزئین و آرائش سے گریز کرنا چاہیے۔ آخر میں اگر آپ کو پراپرٹی میں کسی ایسے مسئلے کا سامنا کرنا پڑتا ہے جو آپ کی وجہ سے پیش نہیں آیا مگر اس سے پراپرٹی کی قیمت پر اثر پڑسکتا ہے تو یہ آپ کی ذمہ داری ہے کہ کرایہ دار کو بلا تاخیر مطلع کریں۔

اگر کرایہ نامے میں اس کے برعکس کچھ موجود نہیں ہے تو مالک مکان پراپرٹی کے ٹیکس اور ایسی دیگر ادائیگیوں کا ذمہ دار ہے۔ تاہم صفائی کے ٹیکس کی ادائیگی کرایہ دار کی ذمہ داری ہے۔ اس ٹیکس کی رقم اور ادائیگی کے طریقے کے بارے میں تفصیلی معلومات کے لیے آپ اپنی میونسپلٹی سے رابطہ کر سکتے ہیں۔

اس کے علاوہ، کرایہ دار پر پڑوسیوں کے ساتھ احترام کے ساتھ پیش آنے کی ذمہ داری ہے۔ آخر میں، مالک مکان کی تحریری اجازت کے بغیر پراپرٹی کسی اور کو دے دینا ترکی کے قانون کے تحت ممنوع ہے۔

تنازعہ کی صورت میں یہ ضروری ہے کہ تنازعہ کو خوش اسلوبی سے حل کرنے کی کوشش کی جائے۔ تاہم اگر تنازعہ میں مدد کی ضرورت ہے تو آپ اس سلسلے میں پولیس یا سرکاری وکیل کے پاس درخواست جمع کرا سکتے ہیں۔ مثال کے طور پر آپ کی رہائش گاہ پر کوئی بلا اجازت داخل نہیں ہوسکتا۔ آپ کو کسی بھی وقت اپنی رضامندی واپس لینے کا حق ہے۔

اگر آپ کو لگے کہ آپ کا مالک مکان معاہدہ کی ذمہ داریوں کی خلاف ورزی کر رہا ہے اور آپ کسی نتیجے پر نہیں پہنچ رہے ہیں تو آپ کے پاس متعلقہ عدالت میں مقدمہ دائر کرنے کا اختیار ہے۔ آپ اس عمل میں قانونی مشاورت یا قانونی نمائندگی حاصل کر سکتے ہیں۔ اگر آپ ایسا کرنا چاہتے ہیں تو براہ کرم یاد رکھیں کہ آپ کو وکیل کی فیس اور کورٹ فیس ادا کرنے کی ضرورت ہوگی۔

تاہم، اگر آپ وکیل کا خرچہ برداشت نہیں کرسکتے تو آپ جہاں رجسٹرڈ ہیں اس صوبے کی بار ایسوسی ایشن سے رجوع کر سکتے ہیں اور قانونی امداد کی درخواست کر سکتے ہیں۔ بار ایسوسی ایشن وکلاء کا پیشہ ور عوامی ادارہ ہے۔ ہر بار ایسوسی ایشن میں ایک لیگل ایڈ بیورو قائم ہے جو ان لوگوں کو مفت قانونی امداد اور معاونت کی خدمات فراہم کرتا ہے جو وکیل اور عدالت کی فیس برداشت نہیں کر سکتے۔ بین الاقوامی تحفظ کے خواہاں تمام افراد، بین الاقوامی تحفظ کا درجہ رکھنے والے افراد، عارضی تحفظ والے افراد اور بے وطن افراد ترکی میں قانونی امداد بیورو کی خدمات سے مستفید ہونے کے حقدار ہیں۔ تاہم آپ کو درخواست دینے کی ضرورت ہے اور آپ کے مطالبے کی وضاحت اور/یا ثبوت میں متعدد دستاویزات فراہم کرنے کی ضرورت ہے۔ تفصیلی معلومات کے لیے براہ کرم اس صوبے کی مقامی بار ایسوسی ایشن سے رابطہ کریں جہاں آپ رجسٹرڈ ہیں۔

اگر آپ تجارتی مقاصد کے لیے جگہ کرائے پر لینا چاہتے ہیں تو آپ کو ممکنہ ٹیکس شناختی نمبر حاصل کرنا ہوگا۔ جس سے آپ جگہ کرائے پر لے رہے ہیں وہ ایک فرد ہے تو آپ کو اسٹاپیج ٹیکس بھی ادا کرنا ہوگا۔

ترکی میں جائیداد خریدنے کے حوالے سے معلومات آپ بیرون ملک ترک سفارت خانوں یا قونصل خانوں، جنرل ڈائریکٹوریٹ آف لینڈ رجسٹری اینڈ کیڈسٹر یا ڈائریکٹوریٹ آف لینڈ رجسٹری کے امور خارجہ کے محکمے سے حاصل کر سکتے ہیں۔ وہ آپ کو بتا سکیں گے کہ کن ممالک کے شہری ترکی میں جائیداد خرید سکتے ہیں یا محدود حقوق حاصل کر سکتے ہیں۔

جائیداد خریدنے سے پہلے بہت سی باتوں کا خیال رکھنا ضروری ہے۔ سب سے پہلے یہ یقینی بنانا ضروری ہے کہ جس شخص کے ساتھ آپ جائیداد کی فروخت کا معاہدہ کررہے ہیں وہ قانونی مالک یا اس کا مجاز ایجنٹ ہے۔ اس کے علاوہ آپ کو یہ دیکھنا ہے کہ جائیداد کی فروخت پر کوئی پابندی تو نہیں ہے۔

جائیداد کے قانونی مالک کو خریدار کو سرکاری ٹائٹل ڈیڈ کی حالیہ تاریخ کی کاپی فراہم کرنی چاہیے۔ اس سے آپ یہ دیکھ سکیں گے کہ آیا جائیداد پر کوئی پابندیاں ہیں کہ نہیں۔ جیسا کہ پہلے کہا گیا ہے، یہ ضروری ہے کہ یہ کاپی حالیہ ہو کیونکہ ٹائٹل ڈیڈ رجسٹری ریکارڈ کی درستگی جاری کرنے کے وقت تک محدود ہے۔ اس لیے ڈائریکٹوریٹ آف لینڈ رجسٹری میں جائداد کی فروخت کی لین دین کو حتمی شکل دینا ضروری ہے۔

ترک شہریوں کی طرح غیر ملکیوں کو بھی ٹائٹل ڈیڈ فیس ادا کرنے کی ضرورت ہے۔ اس کے علاوہ ریل اسٹیٹ ٹیکس سمیت کئی ٹیکسز ہیں جو مالک کو برداشت کرنا ہوں گے۔ غیر ملکیوں پر یہ بھی لازم ہے کہ وہ جائیداد کی انشورنس اسکیم کی تعمیل کریں۔

اگر آپ کے پاس پریزیڈنسی آف مائیگریشن مینجمنٹ کی طرف سے جاری کرده درست شناختی دستاویز ہے تو آپ ترکی میں گاڑی خرید سکتے ہیں۔ ترکی میں گاڑی چلانے کے خواہشمند افراد کے پاس ایک درست ڈرائیونگ لائسنس ہونا ضروری ہے۔

آپ ترکی میں داخلے کے بعد ترکی کے اندر کسی دوسرے ملک میں جاری کردہ اپنا ڈرائیونگ لائسنس بھی استعمال کر سکتے ہیں۔ تاہم 6 ماہ کے بعد، آپ کو ٹرانسپورٹ رجسٹریشن ڈیپارٹمنٹ میں درخواست دے کر اپنے لائسنس کو ترک لائسنس میں تبدیل کروانا ہوگا۔ اس درخواست میں آپ کے آبائی ملک میں جاری کردہ آپ کے ڈرائیونگ لائسنس کے علاوہ آپ کو دیگر دستاویزات بھی پیش کرنے کی ضرورت پڑ سکتی ہے۔ مزید تفصیلی معلومات کے لیے براہ کرم صوبائی سیکیورٹی ڈائریکٹوریٹ کے مقامی ٹرانسپورٹ رجسٹریشن کے محکموں سے رابطہ کریں۔

براہ کرم یاد رکھیں کہ اپنے لائسنس کو تبدیل کرنے کے لیے آپ کو اپنی درخواست میں آپ کے غیر ملکی شناختی نمبر کے ساتھ پریذیڈنسی آف مائیگریشن مینجمنٹ کا جارہ کردہ شناختی دستاویز بھی پیش کرنے کی ضرورت ہو گی جس کا آغاز ’99’ سے ہوتا ہے۔ آپ کو ایک مجاز ڈرائیونگ اسکول کے ساتھ رجسٹر کرنے اور نظریاتی اور عملی دونوں ٹیسٹ پاس کرنے کی بھی ضرورت ہوگی۔

آخر میں، ترکی میں گاڑیوں کے مالکان بھی ٹیکس ادا کرنے اور لازمی انشورنس اسکیموں کی تعمیل کرنے کے پابند ہیں۔